今朝是三八妇女节，早浪厢一进公司，就听到Cici勒了带头敲诈男同事，“中浪厢侬要请客，算帮阿拉过节！”旁边额嗲妹妹一记头想起来，捞出手机打电话拨男朋友，“喂，三八节哦，今朝夜到侬准备送我啥礼物啊？”

　　大概几年之前，OL还是不太过各节日额，各么拨人家归到妇女堆里厢，听上起多少老啦！外加还定了嘎刮三额日脚，3月8日，“三八”！香港电视剧看得多唻，三八么，就是骂人闲话，意思讲侬各额人，佬八卦，佬撮气额！用上海闲话概括就是“十三点”罗！个么迭能，小姑娘还有啥人欢喜过三八妇女节呢？

　　别过，各观念总归会得随牢潮流勒了变额！老早，看电视一塌刮子几只频道、明星么看来看去几只熟面孔，日脚过得平平淡淡，讲老实闲话，侬想要八卦大概

没啥啥对象，没啥机会唻！各么，阿就只好抱牢“弗特侬搭界额，侬不要管！”迭句闲话了。现在么，弗一样唻，数字电视、无线上网额电脑、功能齐全额手机，还有交关报道八卦新闻额报刊杂志，迭能海陆空，国内国际消息灵通，嘎有诱惑力，人总归有得好奇心额呀，阿就心甘情愿额三八一记，套句官话讲就是用“主人翁”态度，关心周围实事了：迭腔勒该流行啥额生活方式，哪里几额明星最最走红……如果侬还能够闷头自管自，要么是有自闭症额毛病，要么就要被人家背后头叫戆大，弗懂经了。既然“三八”都能够拨接受，嘎么，讲到三八节，当然阿要好好较庆祝庆祝了。

　　帮我一道住勒单身公寓里额女朋友，平常辰光工作老忙，每天总归看到伊拎自笔记簿电脑回来加班，昨日居然拎了好几套衣裳跑到我额房间里厢，让我帮伊参谋参谋，哪里一套最适合今朝夜到穿去参加，伊拉集团公司筹办额，三八节，女人之夜额PARTY。据伊讲，夜到所有公司女同事才是上宾，包括老板勒该里厢额所有男同事才要为伊拉服务，包括斟酒送点心、邀请跳舞，一对一送女同事回去。“侬晓得伐，阿拉公司交关帅哥莱，诶有好几额钻石王老五，我要穿得漂亮点，说不定会跟啥人碰出火花。要么，有帅哥陪了旁边，夜到还有人送回去，多少幸福啦！”有嘎好额事体，当然凡是女人才拿三八节当作殊荣来过了，实际浪厢，弗管三八罗、八卦罗，只是想寻找机会让人放轻松点，对阿拉各种整天生活勒了压力当中额人多少是只调剂额机会，弗是蛮好。所以，懂得三八额女人，实际浪厢活得蛮开心，是聪明女人。

　　而且，有交关事体是需要有点八卦态度额。为啥现在职场得意、姿态妖娆额优秀小姑娘嘎许多，就是因为女人天生额三八精神，伊欢喜追根到底额拿一桩事体搞清爽，勒了各过程当中，大概就会发觉一些问题，然后就好马上解决脱；伊为得为了一个场合高头穿啥衣裳，哪能打扮研究半天，迭种认真额态度，大概交关男人是不能够理解跟做到额。只有女人格种贯彻到底额三八精神，再能够横竖横，拿交关事体来看透彻，办彻底了。

　　老巧额，“十三”帮“直率”额上海闲话发音是一模一样额。大概，十三帮直率本身就有点相通额地方。只有够三八，够十三，再能够老直率额看清爽、搞清爽自家额生活方式、生活状态帮生活目标。不晓得，侬是不是有一点三八额十三精神呢？

　　●乱谭

　　三八节嘎三胡

　　钱啦拉

　　吃饭辰光，公司里额Sammy跟Elin了该嘎三胡。
　　Sammy：“明朝三八来，侬老公有啥行动伐啦？”
　　Elin：“伊啊，埃会得做啥？顶多拨我张卡，叫我自家去买眼么事。”
　　Sammy：“嘎推板啊？”
　　Elin：“格么侬男朋友呢？有啥表示伐啦？”
　　Sammy：“去年额辰光，我早上头起来，看到床头柜上把了张纸头，帮我讲‘老婆，节日快乐'。后来下班来接我，先到太平洋，帮我买了一套衣裳，又到新天地伊面搭只吃泰国菜额地方扎扎足足吃了一顿。”
　　Elin：“到底没结婚，是嗲哦呶，不像阿拉老公，没啥意思额，今年情人节，人家么格种辰光花穷送来，伊倒好，讲‘阿拉老夫老妻了，今朝花忒巨，不实惠’，硬劲拉我回去，讲伊来烧几只小菜拨我吃，烧得来难吃萨脱了，第二天才拨阿姨倒脱。情人节哦，啥么事啊没送。”
　　Sammy：“咦，格天不是看到侬办公桌上有花额么？不是侬老公送啊？老实交代，是不是外插花？”
　　Elin：“勿要瞎讲八讲，格是大学同学送额，我对伊没感觉额。还是没结婚好。算了，不要结婚了，吊伊几年。”
　　Sammy：“不来三额，万一吊法吊法拨人家钓去不是死蟹一只？”
　　David格辰光走了进来：“啥么事死蟹一只啊？又勒了三八啦？”
　　Elin：“啥额三八，明朝三八节哦，尊重点女同胞噢。”
　　David：“明朝公司里意思意思伐啦？”
　　Elin：“勿晓得呀，侬对侬老婆有啥表示伐啦？”
　　David：“三八呀，要啥表示啦？迭帮女人阿蛮烦额，啥额节才要轧闹猛，刚刚过好情人节，三八又要来敲竹杠。”
　　Sammy：“格算啥闲话啦？女人么就要靠花额呀。啥么事不送，哪能花得牢啦？”
　　Elin：“格说明女人值铜钿呀。”
　　Sammy：“侬大概不是老吃侬老婆额对伐？否则么事老早就穷送来。”
　　David：“老婆呀，一家人家来，我额钞票就是伊额，格种虚头怪脑额花头有啥白相啦？阿拉老婆老拎得清额，从来不叫我买么事额，伊自家晓得，买啥么事才有伊自家一半钞票勒了里厢。”
　　Elin：“小家败气。”
　　David：“只有侬格种三八才过三八节，帮侬一道轧闹猛额男人啊才是屈西。”
　　Elin：“侬啊，当心三八老婆飞脱，自家成屈西。”

　　●链接

　　八卦跟三八的起源

　　侬勿要刮着好笑，三八跟八卦，本来才是正正经经额么事，勿晓得拨无厘头香港人搞法搞法，意思全部变脱了。

　　想当年，也就差不多100年以前，1909年3月8日，美国芝加哥女工为了多要点钞票，就开始罢工、示威。1910年，哥本哈根开了第二届妇女大会，就定了格天作为妇女节，也算是为妇女争取眼权利。没想到，香港电影就挪格天当作笑话来讲。大概是因为一般发达国家不过格个节，过妇女节额才是眼蛮巴额国家额女人，就用三八来形容巴来西或者十三点西西额女人了。也有人讲是来源于日文欧巴桑，不过格种讲法有点牵强。

　　而八卦额来源更加有意思。本来八卦起源于占卜或数卜，是个要研究萨人额么事。现在大家才晓得是小道消息额意思了。哪能会得格能嘎样子额哪？事体是格能嘎额：

　　当时有一小道消息杂志，为了提升销量，就模仿人家英国成人杂志，勒了刊物里加眼脱光衣裳额女人图片，扫嘎做么做来，又担心当时额社会风气勿能接受，就用八卦图代替马赛克挪迭种重要部位伉伉起来。后来，八卦杂志就成为格种杂志额代称，八卦也就有了小道额意思。蛮有劲额伐？