夏之鸟叫得个断命个凄苦盈盈。夜来头个长亭，阵头雨齐巧落停。蹲勒帐子里向，一滴滴也呒拨心想拿酒吃进。正当留恋个辰光，外头个船喊嘚要开行。捉牢仔渠个手，眼睛望眼睛，侪眼苦盈盈，鼻头嗅啊嗅，叫说一句闲话也讲弗出来。要跑哉，前头千里水面，迷露夹仔浪头，看啊看弗见边头。夜来头个天，暗卜隆咚，像煞阔到呒清也头。

　　多情个人自古勒勒别离个辰光侪啘噻到要命，再加勒勒实梗个八九月份，冷冷清清，哪亨还会有吃得消个人。今朝酒醒个辰光，我会一独自勒勒哪里停？杨柳岸浪，早起头个风吹勒身浪，昨头个亮月还挂勒天浪。今通出去两年，再好个日脚风景也弗会有啥劲。就算有得千种风情么，又好去讲拨啥人听！